Saga Fagmats
Fagmat var stofnað árið 2015 af Sigmundi G. Hermannssyni, húsasmíðameistara og jarðfræðingi, sem flestir þekkja sem Simma smið. Sigmundur býr yfir rúmlega tveggja áratuga reynslu af mannvirkjagerð og sérhæfingu í greiningu á ástandi fasteigna.
Sigmundur er giftur Evu Rún og eiga þau þrjú börn. Hann sækir mikinn stuðning í fjölskyldu sína, en fjölskylduhundurinn Sveppur Sigmundsson er hans dyggasti félagi og fylgir honum gjarnan við dagleg störf.
Menntun og starfsreynsla
Ferill Sigmundar hófst í húsasmíði árið 2001. Hann lauk sveinsprófi árið 2006 og meistaraskóla árið 2015. Samhliða húsasmíðinni lauk hann stúdentsprófi og útskrifaðist með BSc-gráðu í jarðfræði frá Háskóla Íslands árið 2014. Þessi bakgrunnur sameinar verklega þekkingu og fræðilega innsýn í eiginleika byggingarefna og notkun mælitækja.
Starfsferill og sérhæfing
Áður en Fagmat var sett á laggirnar starfaði Sigmundur sem undirverktaki fyrir trygginga- og fasteignafélög, þar sem hann sá um greiningu og viðgerðir fasteigna eftir ýmis tjón. Sú reynsla nýtist við mat á ástandi byggingarhluta og greiningu á upptökum og afleiðingu rakaskemmda í fasteignum.
Endurmenntun
Sigmundur leggur ríka áherslu á að viðhalda þekkingu sinni. Auk fjölda námskeiða hjá Iðunni fræðslusetri hefur hann sótt sérhæfða fræðslu í Noregi og Kanada sem snýr að tækni við ástandsskoðanir, rakamælingar og greiningu á byggingum.
